Greiningardeild Íslandsbanka spáir því að vísitala neysluverð hækki um 0,6% milli mánaða og valda því að verðbólga verði 5,1% en hún hefur ekki verið meiri í 9 ár. Þetta kemur fram á vef bankans.
„Við spáum því að vísitala neysluverðs (VNV) hækki um 0,6% í nóvember frá fyrri mánuði. Ef spá okkar gengur eftir mun 12 mánaða verðbólga mælast 5,1% en var 4,5% í október. Verðbólga hefur ekki mælst svo mikil í 9 ár. Við teljum að verðbólga muni aukast enn frekar á næstu mánuðum áður en hún tekur að hjaðna. Helsta ástæða aukinnar verðbólgu eru íbúðaverðshækkanir ásamt innfluttri verðbólgu sem hefur látið á sér kræla að undanförnu. Verðbólguhorfur hafa versnað frá síðustu spá og teljum við nú að verðbólga verði komin við markmið Seðlabankans í byrjun árs 2023.“
Íslandsbanki telur að íbúðaverð muni halda áfram að hækka næstu mánuði áður en aðgerðir Seðlabankans til að stemma stigu við hækkununum fari að hafa áhrif. Áfram sé eftirspurnaspenna á íbúðamarkaði sem keyri upp verðið.
Eins bendir bankinn á að farið sé að bera á innfluttri verðbólgu. En þar spili eldsneyti stórt hlutverk sem og flugfargjöld sem erfitt sé að ráða í á þessum tíma.
„Við höfum haft töluverðar áhyggjur af innfluttri verðbólgu að undanförnu. Verðlag erlendis hefur farið hækkandi ásamt því að flutningskostnaður hefur aukist gríðarlega. Undanfarna mánuði höfum við séð innflutta verðbólgu láta á sér kræla og samkvæmt mælingum okkar er engin undantekning þar á í nóvembermánuði. Verðbólga er nefnilega ekki einungis bundin við Ísland eins og sést á myndinni. Verðbólga mælist veruleg í flestum löndum sem við berum okkur saman við,“ segir á vef Íslandsbanka.“
