Undanfarið  hefur verið hávær umræða um byrlanir hér á landi. Þannig steig áhrifavaldurinn og skemmistaðaeigandinn Birgitta Líf Björnsdóttir fram á dögunum og sagði að byrlunarfaraldur væri í gangi. Einstaklingur sem er nokkuð þekktur, sérstaklega meðal ungs fólks, hefur að undanförnu verið bendlaður við byrlanir á skemmtistöðum í miðbænum.

Orðrómurinn um þennan tiltekna einstakling hefur verið í mikilli dreifingu á samfélagsmiðlum. Sem dæmi má nefna  eftirfarandi færslu á Twitter. „Var að frétta af „þekktum“ byrlara, einstaklingur sem er frekar þekktur í samfélaginu og sérstaklega meðal ungs fólks. Getur fólk ekki bara hagað sér, komin með fokking ógeð,“ skrifar sú sem birti færsluna varðandi hinn meinta byrlara.

Færslan hefur fengið um 200 athugasemdir þar sem fólk biður um nafn einstaklingsins svo það geti varað sig á honum og varað aðra við.

Varaþingmaður hrósar sigri

Lenya Rún Taha Karim, varaþingmaður Pírata, er ein þeirra sem hefur frétt af einstaklingnum sem um ræðir. „Ég fékk mynd af honum sem ég sendi svo á bestu vinkonu mína sem sendi svo á vinkonu sína. Þetta var bara í gær minnir mig,“ segir Lenya um málið í samtali við DV en hún birti færslu um einstaklinginn sem um ræðir á Twitter-síðu sinni í gær.

Í færslunni segir hún að í kjölfarið á myndasendingu sinni og vinkvenna sinna hafi einstaklingurinn verið bannaður á nokkrum skemmtistöðum borgarinnar. Í athugasemdunum við færsluna hennar Lenyu má einnig sjá fjölda fólks biðja um nafn einstaklingsins svo hægt sé að vara sig á honum. Meðal þeirra sem biðja um nafnið eru rekstraraðilar skemmtistaða.

Fékk senda mynd af frægum byrlara frá vinkonu minni sem hún fékk senda frá vinkonu sinni sem ég sendi á vinkonu mína sem sendi á vinkonu sína og nú er gæjinn bannaður á nokkrum skemmtistöðum

Gellur. Eru. Gellum. Bestar.

— Lenya Rún (@Lenyarun) November 3, 2021

„Við búum bara á tímum þar sem vinkonur þurfa að spyrja hvora aðra út í svona hluti, þurfa að vara hvora aðra við mönnum sem samfélagið er að tala um,“ segir Lenya. „Þannig mér finnst alveg frekar eðlilegt að vera að spyrja fólk spurninga um hvort þau hafi heyrt af þessari manneskju eða hvort einhver nákominn hafi lent í honum.“