„Ég kom inn með sjón á báðum augum en kom út blindur á hægra auga,“ segir Steinar Marberg Egilsson í viðtali við RÚV í kvöld.

Steinar hafði verið í augnmeðferð á vinstra auga á Landspítala og var svo sendur í lokameðferð vegna bjúgs á því auga til augnlæknis á stofu í mars 2016. Þar setti læknirinn leysi í vinstra augað og ákveður að setja svo leysigeisla í hægra augað líka. Um þetta segir Steinar við RÚV:

„Og ég nefni það við hana að það sé ekkert að hægra auganu og hún segir bara miðað við að ég sé kominn á þann aldur og það kosti mig ekki neitt og það hafi engin áhrif á sjónina, og maður þarf að taka svona splitt ákvörðun bara með öll tækin í andlitinu. Og ég náttúrulega treysti lækninum og hún setur leysi í hægra augað á mér. Þannig að ég fer inn með sjón á báðum augum og kem blindur út á hægra auga sem var alveg í lagi.“

Steinar er afar ósáttur við viðbrögð Landlæknis við kvörtun hans. Niðurstaðan var sú að skort hafi á upplýsingagjöf læknisins til Steinars en þó sé ekki talið að læknirinn hafi gert mistök með leysiaðgerðinni né sýnt vanræsklu. Í álitinu frá Landlækni er sykursýki Steinars álitin orsakavaldur í málinu. Telur hann það vera úr lausu loftið gripið.

Það er álit matsmanna, sem héraðsdómur kvaddi til, að sykursýki Steinars hafi ekki valdið sjónskerðingunni enda hafi versnun sjónarinnar orðið nánast samstundis eftir aðgerðina. Landlæknir hefur neitað að taka málið upp að nýju og ætlar lögfræðingur Steinars að kæra málsmeðferðina til ráðherra.

Sjá nánar á vef  RÚV