Cristiano Ronaldo, framherji Manchester United, kæmist ekki í sameiginlegt lið Manchester United og Liverpool sem væri valið af Jamie Carragher, fyrrverandi leikmanni Liverpool og sérfræðingi um ensku úrvalsdeildina á Sky Sports. Carragher telur einnig að Ronaldo myndi ekki komast í byrjunarlið Liverpool í dag.
Erkifjendurnir í Manchester United og Liverpool mætast á sunnudaginn næstkomandi í ensku úrvalsdeildinni í aðdraganda leiksins voru Carragher og Gary Neville, sérfæðingar Sky Sports beðnir um að velja sameiginlegt lið liðanna.
Þar sem Carragher er fyrrum leikmaður Liverpool gefur að skilja að það sé Liverpool slagsíða í liði hans sem er eftirfarandi:
Markvörður : Alisson (Liverpool)
Hægri bakvörður: Trent Alexander Arnold (Liverpool)
Miðverðir: Joel Matip og Virgil Van Dijk (Liverpool)
Vinstri bakvörður: Andy Robertson (Liverpool)
Miðjumenn: Jordan Henderson og Fabinho (Liverpool)
Hægri kantur: Mohamed Salah (Liverpool)
Framliggjandi miðjumaður: Bruno Fernandes (Manchester United)
Vinstri kantur: Sadio Mané (Liverpool)
Framherji: Mason Greenwood (Manchester United)
Það sem þykir athyglisvert við lið Carragher er sú staðreynd að það er ekki pláss fyrir einn besta leikmann knattspyrnusögunnar, framherjann Cristiano Ronaldo.
,,Ég er mikill aðdáandi Greenwood, í mínum augum er hann stórstjarna. Hvernig get ég ekki haft Ronaldo í liðinu mínu? Ég vel lið mitt út frá stöðu leikmanna í dag og ég myndi velja Greenwodd framyfir hann,“ sagði Carragher í útsendingu Sky Sports í gær.
