Auglýsingar frá stjórnmálaflokkunum hafa verið áberandi síðustu vikur enda kosningar til Alþingis nýafstaðar. Flokkarnir voru misfrumlegir og fóru ólíkar leiðir í auglýsingunum en það var líka töluvert mismunandi hversu miklu þeir eyddu í auglýsingar á Facebook.

Flokkur fólksins eyddi mestu í Facebookauglýsingar á tímabilinu 28. ágúst til 26. september eða 5,6 milljónum. Þar á eftir kom Miðflokkurinn með 4,9 milljónir og síðan Sjálfstæðisflokkurinn með 3.3. Tölurnar miðast við auglýsingaskýrslu frá Facebook.

Tekið skal fram að þarna er miðað við aðalsíður flokkanna en flestir hafa flokkarnir ýmsar undirsíður sem kaupa auglýsingar til viðbótar við þetta, svo sem Sjálfstæðisflokkurinn í Reykjavík, Píratar í Norðavesturkjördæmi og Miðflokkurinn í Suðurkjördæmi.

Þeir níu flokkar sem náðu kjöri á þing eyddu alls tæpum 20 milljónum króna í auglýsingar á aðalsíðum sínum á Facebook síðustu 30 dagana fyrir kosningar. Þingflokkarnur eru að langstærstu leyti fjármagnaðir með opinberu fé.

Facebook er erlent stórfyrirtæki sem greiðir enga skatta hér á landi og því má segja að stjórnmálaflokkarnir hafi flutt tugi milljóna króna úr íslensku hagkerfi á síðustu vikum.

Þeir einstöku frambjóðendur sem eyddu mestu á Facebook á sama tímabili sjást í meðfylgjandi töflu. Tveir ráðherrar Framsóknar eru þar efstir, Ásmundur Einar Daðason sem eyddi 583 þúsund krónum og Lilja Dögg Alfreðsdóttir sem eyddi 314 þúsundum.

Bjarni Benediktsson, fjármálaráðherra, sagði í samtali við RUV í maí vona að samstaða náist innan OECD um samræmda skattlagningu á alþjóðlega miðla eins og Facebook og Google. Miklir hagsmunir séu í húfi.