Arsenal vann glæsilegan sigur á Tottenham í leik í ensku úrvalsdeildinni sem var að ljúka. Um sjálfan Norður-Lundúnaslaginn var að ræða.
Emile Smith-Rowe kom Arsenal yfir á 12. mínútu. Eftir gott samspil liðsins renndi Bukayo Saka boltanum á Smith-Rowe sem skoraði.
Arsenal var miklu betri aðilinn í fyrri hálfleik og bætti Pierre-Emerick Aubameyang við öðru marki. Smith-Rowe sendi boltann þá út á Gabon-manninn eftir góða skyndisókn og hann skoraði.
Þriðja Arsenal kom á 34. mínútu. Saka fékk þá boltann út á hægri, skaut að marki en Harry Kane renndi sér fyrir hann. Saka fékk boltann þó aftur og skoraði.
Tottenham virtist ekkert ætla að ógna forystu Arsenal seinni hálfleik en á 79. mínútu minnkaði Heung-Min Son muninn. Hann stýrði þá fyrirgjöf Sergio Reguilon í netið.
Aaron Ramsdale, markvörður Arsenal, þurfti einu sinni að verja svakalega eftir skot frá Lucas Moura. Tottenham komst þó ekki nær heimamönnum. Lokatölur 3-1.
Þetta var þriðji sigur Arsenal í röð. Liðið er í tíunda sæti með 9 stig.
Tottenham hefur aftur á móti tapað þremur leikjum í röð. Liðið er einnig með 9 stig.
