Lögreglustjórinn á Norðurlandi eystra hefur ákært tvo menn frá Litháen, annan um þrítugt og hinn um fertugt, fyrir skrautlegt innbrot í sumarbústað í Kotabyggð á Akureyri. Listinn yfir það sem mennirnir stálu og reyndu að stela úr bústaðnum er ærið skrautlegur, eða eins og segir í ákæru:

„…fyrir þjófnað og tilraun til þjófnaðar, með því að hafa aðfararnótt mánudagsins 20. janúar 2020, staðið saman að því að fara inn í sumarbústað að Kotabyggð 15 á Akureyri og stela þaðan einni rauðvínsflösku, einni hvítvínsflösku, 6 bjórum (Einstök), ausu, brýni, fótum undan Bang & Olufsen hátalara og nokkrum appelsínum, og hafa gert tilraun til að stela Bang & Olufsen hátalara að verðmæti 300.000 krónur, ryksugu og ullarteppi, en ákærð flúðu af vettvangi þegar forsvarsmaður eiganda húseignarinnar kom að þeim við atferli sitt.“

Eins og greinir frá í ákærunni kom forsvarsmaður eiganda bústaðarins að mönnunum og flúðu þeir þá af vettvangi án þess að þeim hafi tekist að hafa allt með sér sem þeir reyndu að stela.

Ekki hefur tekist að birta öðrum manninum ákæru og er honum því birt fyrirkall í Lögbirtingablaðinu auk þess sem ákæran er birt þar.

Málið verður tekið fyrir hjá Héraðsdómi Norðurlands eystra 2. desember næstkomandi.