Klukkan 23.44 í gærkvöldi varð umferðarslys á gatnamótum í miðborginni. Bifreið var ekið á rafskútu og endaði ökumaður hennar á framrúðu bifreiðarinnar og farþegi á rafskútunni féll í götuna. Ökumaður rafskútunnar var fluttur með sjúkrabifreið á bráðadeild. Ökumaður bifreiðarinnar og farþegi rafskútunnar meiddust ekki. Ökumaður bifreiðarinnar er grunaður um að hafa verið undir áhrifum fíkniefna og vörslu fíkniefna. Ökumaður rafskútunnar er grunaður um ölvun við akstur.

Á ellefta tímanum í gærkvöldi var tilkynnt um innbrot í geymslur í fjölbýlishúsi í Garðabæ. Brotist hafði verið inn í þrjár geymslur og verðmætum stolið úr einni.

Á þriðja tímanum í nótt var maður handtekinn í Kópavogi en hann hafði farið inn um ólæstar dyr á íbúðarhúsi og stolið yfirhöfn og síma.  Maðurinn var vistaður í fangageymslu og þýfinu komið aftur til eiganda.

Einn ökumaður var handtekinn í nótt grunaður um að vera undir áhrifum fíkniefna og ítrekaðan akstur án þess að hafa öðlast ökuréttindi.