Hanna Björg Vilhjálmsdóttir, framhaldsskólakennari og formaður jafnréttisnefndar Kennarasambands Íslands, segist síðast í morgun (sunnudaginn 29. ágúst) hafa frétt af hópnauðgun sem landsliðsmenn í knattspyrnu hafi gerst sekir um. Segir hún að móðir stúlku sem hafi orðið fyrir hópnauðgun landsliðsmanna fyrir nokkrum árum hafi haft samband við sig í morgun. Hanna Björg segist vita hverjir gerendurnir eru.
Þetta kom fram í útvarpsþættinum Spengisandi á Bylgjunni í morgun.
Hanna Björg skrifaði grein fyrir rúmlega hálfum mánuði þar sem hún vakti athygli á reynslusögu konu sem sakaði tvo þekkta menn um nauðgun gegn sér árið 2010 í frásögn á Instagram. Hanna Björg kallaði eftir því að KSÍ axlaði ábyrgð í málinu og varaðist þöggun. KSÍ svaraði með nafnlausri tilkynningu þar sem því var vísað á bug að sambandið þaggaði niður kynferðisbrotamál.
Hanna Björg segir að þolendur þori ekki að nafngreina gerendur af ótta við fjárkúgun lögfræðinga og að vera úthrópaðir í kommentakerfum.
„Við erum meðvirk með viðbjóðslegum glæpum sem hafa svívirðilegar afleiðingar,“ sagði hún, og ennfremur: „Spjótin standa núna á KSÍ. Þetta er samfélagslegt mein sem við verðum að halda áfram að tala um þangað til það breytist.“
Hanna Björg bendir á að hún hafi ekki vitað um mál Þórhildar Gyðju Arnardóttur sem steig fram í viðtali við RÚV á föstudagskvöld vegna máls landsliðsmanns frá árinu 2017, þegar hún hóf að blanda sér í þessa umræðu. Þórhildur varð fyrir kynferðis- og ofbeldisárás landsliðsmanns á skemmtistað í Reykjavík árið 2017. Leikmaðurinn játaði brot sitt og greiddi skaðabætur vegna þess. Þórhildi blöskraði framganga Guðna Bergssonar, formanns KSÍ, er hann sagði að engar tilkynningar um kynferðisofbeldi landsliðsmanna hefðu borist KSÍ, í viðtali við RÚV kvöldið áður. Upplýsingar Þórhildar leiddu í ljós að Guðna og starfsfólki KSÍ var vel kunnugt um mál landsliðsmannsins.
Hanna Björg segist ekki vita hvort væri verra ef formaðurinn, stjórn og starfsfólk KSÍ vissi ekkert um þessi mál eða þegðu þau í hel. Þau væru ekki starfi sínu vaxin ef þau vissu ekki af þessum málum. „En auðvitað vita þau af þessu,“ sagði hún.
„Þó að spjótin standi núna á KSÍ þá er þetta samfélagslegt mein sem við verðum að halda áfram að tala um þangað til það breytist,“ sagði Hanna Björg Vilhjálmsdóttir enn fremur í viðtali við Sprengisand.
