Egill Helgason, fjölmiðlamaður, telur að Sósíalistaflokkurinn geti valdið því að næsta ríkisstjórn verði ekki vinstri stjórn. Hann ræðir þetta í færslu sem hann skrifar á Facebook-síðu sína og deilir viðtali við Bjarna Benediktsson fjármálaráðherra þar sem hann segir það óásættanlegt að heilbrigðiskerfið ráði ekki við Covid-19 bylgjuna sem nú gengur yfir.

„Þetta sætir nokkrum tíðindum. Í miðjum faraldri tekur Bjarni upp á því að finna sök hjá heilbrigðiskerfinu. Svandís er auðvitað ráðherra heilbrigðismála en Bjarni fer með fjárveitingavaldið. Það eru óþægilegir dagar innan ríkisstjórnarinnar og greinilega lítil samstaða um aðgerðir,“ segir Egill.

Hann telur að það sé farið að trosna á milli Vinstri grænna og Sjálfstæðisflokksins og vill meina að þá sé vinstri stjórn næsta skref.

„Fylgisaukning Sósíalistaflokksins gæti hins vegar komið í veg fyrir slík áform. Hann tekur fylgi frá öðrum flokkum til vinstri en virðist ansi ólíklegur kostur þegar kemur að myndun stjórnar. Það er alveg ljóst að kosningarnar 25. september eru farnar að hafa áhrif á stefnuna og málflutninginn í sóttvörnum,“ segir Egill en Sósíalistaflokkurinn mælist með rétt yfir fimm prósent í nýjustu skoðanakönnunum.

Ólíklegt er að flokkurinn sæki fylgi sitt til fyrrum Sjálfstæðismanna og því eru þetta líklega fimm prósent sem annars myndu kjósa hina vinstri flokkana.