Bragi Þór Thoroddsen, sveitarstjóri Súðavíkurhrepps, féll í á og slasaðist, á Gönguhátíðinni í Súðavík. Hann mun ekki vera alvarlega slasaður en er úr leik á gönguhátíðinni.

Þetta kemur fram í tilkynningu frá forvígismanni hátíðarinnar, Einari Skúlasyni. Þar segir ennfremur að hátíðin haldi áfram án sveitarstjórans og gangi vel. Tilkynningin er eftirfarandi:

„Sveitarstjórinn slasaðist en dagskráin heldur áfram!

Gönguhátíðin í Súðavík er haldin í ótrúlegri veðurblíðu og þriðja daginn í röð er hitinn að ná í 20 stigin. Dagskráin hefur gengið vel, en þú varð áfall á fimmtudagskvöld þegar Bragi sveitarstjóri datt við ána í þorpinu og slasaðist og þó að það hafi farið betur en á horfðist þá er hann úr leik á gönguhátíðinni. Það er miður enda ætlaði hann í allar göngurnar og aðstoða við leiðsögn. Anna Lind skólastjóri Súðavíkurskóla mun hins vegar leiða flestar göngurnar og vaskur hópur aðstoðar hana. Fjöldi fólks mætti að brennunni við sjávarsíðuna í gærkvöldi og dagsgangan úr Önundarfirði fór vel fram þrátt fyrir mikinn hita.

Í morgun fór ríflega 20 manna hópur af stað í göngu yfir Súðavíkurfjallið, síðdegis kl. 17 verður söguganga um Súðavík og í kvöld verður útidansleikur við Raggagarð.

Í fyrramálið verður dagsganga að Galtarvita um Bakkaskarð. Svo verður ganga í Valagil kl. 11 og Ögurganga kl. 12. Um kvöldið verður alþjóðleg matarveisla með réttum frá Portúgal, Tælandi, Búlgaríu, Noregi og Þýskalandi.

Á mánudagsmorgun verður svo hin árlega morgunganga á Kofra.“