Razvan Nicolas heitir rúmenski maðurinn sem er talinn hafa orðið Daníel Eiríkssyni að bana á föstudaginn langa. Í gær greindi DV frá því að hann væri flúinn af landi brott, líklega á fölskum skilríkjum. Hann hefur farið mikinn á samfélagsmiðlum síðustu daga.

Vísir greindi frá því í dag að til standi að gefa út evrópska handtökuskipun á hendur honum. Lögregla telur sig vita hvar hann sé niður kominn, hann hafi flogið til London og þaðan til Rúmeníu. Haft er eftir Margeiri Sveinssyni, aðstoðaryfirlögregluþjóni hjá lögreglunni á höfuðborgarsvæðinu, að hann sé bjartsýnn með að ná manninum aftur til landsins.

Daníel Eiríksson fannst illa leikinn á jörðinni fyrir utan heimili sitt í Kópavogi á föstudaginn langa, þann 2. apríl síðastliðinn, aðeins tveimur klukkustundum áður en hann átti að mæta í viðtal hjá ráðgjafa í aðdraganda innlagnar inn á meðferðarheimilið Vog. Daginn eftir, þann 3. apríl, var Daníel úrskurðaður látinn á sjúkrahúsi.

„Mér finnst eins og löggan nenni lítið að gera“

Til að byrja með voru þrír rúmenskir karlmenn handteknir, en tveimur var sleppt úr haldi. Razvan Nicolas var einn eftir. Bíll hans kom við sögu í málinu en grunur leikur á að ekið hafi verið á Daníel. Razvan hefur sagt að um slys hafi verið að ræða. Daníel hafi hangið utan á bílnum og fallið í jörðina þegar maðurinn ók burtu. Líkt og DV hefur greint frá leggja ástvinir Daníels lítinn trúnað á þá frásögn.

Sjá einnig: Banamaður Daníels flúinn úr landi – „Hvað þurfum við að þjást mikið? Hvenær fær Danni réttlæti?“

Seðlabúnt og skartgripir á samfélgsmiðlum

Einnig kom fram að ástvinir Daníels litu svo á að Razvan iðraðist ekki gjörða sinna. Á samfélagsmiðlinum TikTok stærir hann sig af seðlabúntum og skartgripum, en fjölskylda Daníels telur hann afla sér mikilla tekna með sölu fíkniefna. Þá má einnig sjá myndbönd af honum í flugvél, en eitt þeirra birtist fyrir viku síðan.

Hér má sjá myndbönd sem birtist á TikTok-reikningi hans:

„Það er greinilega ekki nógu vel fylgst með honum, það var búið að lofa okkur að lögreglan væri að fylgjast með ferðum hans á meðan hann væri i farbanni. Svo flýr hann land eins og ekkert sé eðlilegra Allt okkar traust er farið,“ segir Guðný Sigríður Eiríksdóttir, systir Daníels heitins, í samtali við DV.

„Þetta á ekki að gera gerst! Þetta er algjörlega út í hött. Þessir glæpamenn koma inn og út úr landinu á fölsuðum skilríkjum,“ segir Guðný enn fremur. „Hann er með milljónir á sér og er að auglýsa það á samfélagsmiðlum. Hann er ekki að vinna hér á landi en er líklega að selja eiturlyf.“