Kevin Sharp, umboðsmaður miðjumannsins Kalvin Phillips hjá Leeds, segir að leikmaðurinn hafi engan áhuga á að fara frá félaginu þrátt fyrir að frammistaða hans með enska landsliðinu á Evrópumótinu hafi verið góð.

Hinn 25 ára gamli Phillips vann sér inn sæti í enska landsliðinu fyrir EM 2020 eftir gott tímabil með Leeds. Hann er nú orðinn fastamaður á miðjunni hjá Gareth Southgate, landsliðsþjálfara.

Þó svo að góður árangur hans inni á vellinum veki vissulega áhuga stærri liða þá segir Sharp að leikmaðurinn hafi engan áhuga á að fara frá Leeds.

,,Það eru kannski félög að horfa til hans núna því ef þú stendur þig vel – og spilar fyrir England á stórmótum – þá færðu athygli. En Kalvin er ánægður hjá Leeds og hefur engan áhuga á því að fara. Hann vill halda því áfram sem hann hefur gert fyrir lið og land.“