Enn eitt sumarið er Wilfried Zaha orðaður við Arsenal. Zaha hefur gert það ljóst fyrir stjórnarformönnum Crystal Palace að hann vilji komast í stærra lið í sumar og eru Arsenal, Tottenham og Everton sögð áhugasöm um kappann.

Emmanuel Petit, fyrrum leikmaður Arsenal, hvetur sitt gamla félag til þess að semja við Zaha í sumar þar sem hann sé leikmaðurinn sem Arsenal þarf.

„Zaha er óútreiknanlegur leikmaður, þú veist ekki hvað hann ætlar að gera við boltann,“ sagði Petit við Paddy Power í vikunni.

„Hann er sterkur karakter og þarf stundum að stjórna tilfinningum sínum en hann er nákvæmlega leikmaðurinn sem Arsenal þarf. Aðdáendur eru spenntir fyrir honum og leikmenn eru það líka.“

„Arsenal hefur ekki haft leikmann sem er svona góður með boltann í langan tíma, þeir þurfa einhvern sem getur tekið ábyrgð og er óhræddur við að taka varnarmenn á.“

Mikil pressa er á Arsenal að gera vel á félagsskiptamarkaðinum í sumar eftir enn eitt vonbrigða tímabil. Félagið endaði í 8. sæti og tekur því ekki þátt í neinum Evrópubolta í vetur.