Steinþór Már Auðunsson var lítið þekkt nafn í heimi fótboltans hér á landi fyrir nokkrum vikum síðan. Stubbur eins og hann er kallaður á Akureyri hefur hins vegar slegið í gegn í efstu deild karla með KA, markvörðurinn stóri og stæðilegi hefur varið mark KA af stakri snilld í upphafi sumars.

Segja má að Stubbs æði ríki nú á Akureyri en Stubbur átti frábæran leik í marki KA er liðið vann 0-1 sigur á Stjörnunni í gær. KA er með 13 stig eftir sex umferðir og á Stubbur stóran þátt í góðum árangri liðsins.

Stubbur gekk í raðir KA í vetur og átti fyrst og fremst að verma varamannabekkinn, hann var fenginn til að vera til taks ef Kristijan Jajalo myndi meiðast. Jajalo meiddist svo nokkrum dögum fyrir fyrsta leik og Stubbur fékk stóra tækifærið og greip það með báðum höndum.

Forráðamenn KA virtust þó ekki ætla að treysta Stubbi sem hafði enga reynslu úr efstu deild og fékk félagið Vladan Djogatovic til liðs við KA. Stubbur hefur hins vegar ekki stigið feilspor í sex fyrstu leikjum sumarsins og Djogatovic hefur setið sem fastast á bekknum.

Stubbur sem er fæddur árið 1991 hefur spilað fyrir Magna, Dalvík/Reyni, Völsung Þór og KA. Hann ólst upp í KA og lék tvo leiki fyrir félagið árið 2007 í Lengjudeildinni eins og hún heitir í dag.

Hvaðan kemur nafnið?

Gælunafnið Stubbur á ekkert sérstaklega vel við Steinþór enda er hann stór og stæðilegur maður, hann var spurður út í nafnið á Stöð2 Sport í gær.

„Ég fékk gælunafnið fyrir mörgum árum þegar ég var yngstur að spila upp fyrir mig, þá fékk ég nafnið Stubbur af því að ég var lang stærstur. Þetta átti að vera kaldhæðni þetta gælunafn, en því miður þá festist mitt,“ sagði Stubbur léttur í lund á Stöð2 Sport.

Stubbur ætlar ekki að gefa tommu eftir og ætlar að halda sæti sínu í liði KA. „Maður vill ekki setjast á bekkinn þegar maður hefur fengið smjörþefinn af því að spila, maður heldur áfram að gera sitt besta.“

Mikil umræða hefur verið um Stubb á samfélagsmiðlum eins og sjá má hér að neðan.

Rosalega finnst mér auðvelt að gleðjast yfir því hvernig Stubbur hefur komið inn hjá KA. Öðlings drengur í alla staði og megi honum ganga sem allra best.

— Jón Stefán Jónsson (@Jonsi82) May 24, 2021

Sama hvað mönnum finnst um KA þá er Stubbur ekkert eðlilega flottur.

— Óðinn Svan Óðinsson (@OdinnSvan) May 24, 2021

Stubbur langbestur á vellinum, takk fyrir þitt framlag👑

— Björgvin Hannesson (@BjorgvinH) May 24, 2021

Grasið er grænt himininn blár og stubbur góður, allt eins og það á að vera

— Ómar Már (@MrOmarmar00) May 24, 2021

Stubbur ég elska þig 🙂 Dusan samt maður leiksins. Hark en frábær 3 stig í hús!! #LifiFyrirKA

— saevar petursson (@saevarp) May 24, 2021

Fékk Stubbur í alvöru ekki kall í landsliðið?

— Sveinbjörn Bergmann (@SvenniMar) May 24, 2021

Hver er þessi Stubbur? Sá er að standa sig..⚽ #pepsimaxdeildin

— Bjossi á Borg (@BjrnKPlmarsson) May 24, 2021