HK tók á móti FH í 4. umferð Pepsi-Max deildar karla í Kórnum í kvöld. Leiknum lauk með 1-3 sigri FH.
Birnir Snær Ingason braut ísinn í leiknum er hann kom heimamönnum yfir eftir tæplega hálftíma leik. Ágúst Eðvald Hlynsson jafnaði aðeins nokkrum mínútum síðar eftir stoðsendingu frá Matthíasi Vilhjálmssyni.
HK fékk frábært tækifæri til þess að komast yfir á 40. mínútu þegar Elías Ingi dómari dæmdi vítaspyrnu fyrir HK. Stefan Alexander fór þá illa að ráði sínu og lét Gunnar Nielsen verja frá sér.
Ágúst Eðvald var aftur á ferðinni í seinni hálfleik þegar hann kom gestunum yfir, aftur eftir stoðsendingu frá Matta Vill. Steven Lennon gulltryggði sigur FH-inga undir lok leiks eftir stoðsendingu frá Ágústi Eðvald.
FH er með 10 stig eftir fyrstu fjóra leikina og HK með tvö stig.
HK 1 – 3 FH
1-0 Birnir Snær Ingason (´28)
1-1 Ágúst Eðvald Hlynsson (´33)
1-2 Ágúst Eðvald Hlynsson (´57)
1-3 Steven Lennon (´86)
ÍA tók á móti Stjörnunni í 4. umferð Pepsi-Max deildar karla á Norðurálsvellinum. Leiknum lauk með 0-0 jafntefli. Leikurinn var sannkallaður botnbaráttuslagur en liðin eru í neðstu sætum deildarinnar með tvö stig, ásamt Fylki og HK.
ÍA 0 – 0 Stjarnan
