Lögreglan í Dubai handtók nýlega Michael Moogan en hans hafði verið leitað í átta ár vegna gruns um aðild hans að stórfelldu fíkniefnasmygli. Hann var á lista bresku lögreglunnar yfir þá glæpamenn sem hún leggur mesta áherslu á að ná.

Moogan, sem er 35 ára, hafði verið á flótta allt síðan hollenska lögreglan réðist til atlögu við kaffihúsið The Cafe de Ketel í Rotterdam en grunur lék á að þar hittust fíkniefnasmyglarar og handlangarar þeirra. Breska lögreglan telur að á kaffihúsinu hafi smygl á hundruðum kílóa af fíkniefnum til Bretlands verið skipulagt í viku hverri.

Moogan og tveir aðrir Bretar tengdust kaffihúsinu en það var ekki opið fyrir almenning og aðeins var hægt að komast þangað inn eftir ákveðnu öryggiskerfi. Breska lögreglan telur að Moogan og félagar hans hafi komið að skipulagningu fíkniefnasmygls frá Suður-Ameríku til Evrópu.

Lögreglan í Dubai telur að Moogan hafi komið til landsins með því að nota fölsuð skilríki. Hann hafi síðan lagt mikið á sig til að sneiða hjá eftirlitsmyndavélum í landinu til að villa um fyrir lögreglunni. Hann fannst þó á endanum og var handtekinn 21. apríl að sögn Sky News.

Hann verður framseldur til Bretlands.