Fyrsta leiknum í dag í ensku úrvalsdeildinni var að ljúka rétt í þessu. Newcastle tók á móti West Ham í 32. umferð á St. James´s Park og lauk leiknum með 3-2 sigri heimamanna.

Newcastle litu vel út í fyrri hálfleik og fyrsta mark leiksins skoraði Issa Diop  á 36. mínútu þegar hann varð fyrir því óláni að skora sjálfsmark. Saint-Maximin átti skot að marki og Diop og Fabianski flæktust fyrir hvorum öðrum og boltinn endaði í netinu eftir viðkomu í Diop. Á sömu mínútu fékk Dawson seinna gula spjaldið sitt og þar með rautt sem þýddi að leikmenn West Ham voru manni færri. Joelinton nýtti sér liðsmuninn og kom Newcastle tveimur mörkum yfir á 41. mínútu eftir slæm mistök hjá Fabianski í markinu.

Enginn veit hvað Steve Bruce sagði við sína menn í hálfleik en liðið átti slappan seinni hálfleik þar sem West Ham voru með öll völd á vellinum. Það var enginn annar en Issa Diop sem minnkaði muninn fyrir West Ham á 73. mínútu með flottum skalla og Jesse Lingard jafnaði metin úr víti sjö mínútum síðar.

Leikmenn Newcastle neituðu þó að gefast upp og kom Joe Willock heimamönnum aftur yfir á 82. mínútu með skalla en hann hafði aðeins verið inni á vellinum í tæpa mínútu og þar við sat.

Newcastle fara með sigrinum í 15. sæti deildarinnar og eru níu stigum frá falli. West Ham situr ennþá í 4. sætinu en Chelsea og Liverpool eru skammt undan.