Þorbjörg Sigríður Gunnlaugsdóttir, þingmaður Viðreisnar, lagði í nóvember fram frumvarp um breytingar á ákvæði hegningarlaga um dreifingu barnaníðsefnis á netinu. Málið hlaut ekki brautargengi, þrátt fyrir að hafa bæði vakið mikla jákvæða athygli og að þingmenn allra flokka hafi tekið þátt í að leggja frumvarpið fram, en Þorbjörg var fyrsti flutningsmaður þess.
Í aðsendri grein sem birtist á Vísir.is í dag segir Þorbjörg að barnaníðsefni sé vaxandi vandamál og að Ísland hafi dregist aftur úr hinum Norðurlöndunum þegar kemur að löggjöf til að taka á þessum brotum af meiri festu. Í frumvarpi hennar hafi til að mynda verið að refsirammi fyrir stórfelld brot af þessu tagi verði hækkaður úr tveimur árum í sex ár
„Svo gerist það núna að dómsmálaráðherra er að leggja fram frumvarp sem er nánast hið sama og frumvarpið sem hefur legið fyrir á þingi mánuðum saman, það leggur til sama refsihámark, sömu ítrekunarheimild, nefnir sömu verknaðaraðferðir og fjallar um sjónarmið sem líta á til við mat á alvarleika brota. Og þá var skýringin kannski komin á því að mál sem naut stuðnings af hálfu fagaðila, samtaka og innan þingsins sjálfs komst samt ekki áfram og fékk ekki umræðu. Getur virkilega verið að lagabreyting sem varðar vernd barna gegn barnaníðsefni hafi legið óhreyft í þinginu mánuðum saman vegna þess að dómsmálaráðherra var ekki sjálf að skrifuð fyrir málinu?“ spyr Þorbjörg í greininni sem ber yfirskriftina Sama hvaðan gott kemur?
Greinina í heild sinni má lesa með því að smella hér.