Þrír leikmenn velska landsliðsins, þeir Tyler Roberts, Hal Robson-Kanu og Rabbi Matondo, voru sendir heim úr landsliðsverkefni eftir að hafa brotið útgöngubann á liðshóteli landsliðsins sem var sett á vegna Covid-19 heimsfaraldursins.

Leikmennirnir þrír voru gripnir glóðvolgir eftir að hafa farið af hótelherbergjum sínum í leyfisleysi í kjölfarið á 1-0 sigri Wales á Mexikó í vináttuleik á laugardaginn.

Þetta þýðir það að leikmennirnir munu missa af mikilvægum leik velska landsliðsins gegn Tékklandi í undankeppni HM á morgun.

Robert, sem er einnig leikmaður Leeds United í ensku úrvalsdeildinni, hefur beðist afsökunar á hegðun sinni.

„Miður mín að vera á heimleið úr landsliðsverkefninu fyrr en ég átti von á en reglur eru reglur.“

„Ég vil biðja liðsfélaga mína, þjálfarateymi og stuðningsmenn landsliðsins, afsökunar. Ég mun halda áfram að leggja hart að mér til að vinna mér inn sæti í landsliðshópi Wales fyrir EM í sumar,“ var meðal þess sem stóð í afsökunarbeiðni Roberts.

Knattspyrnusamband Wales, tilkynnti fyrst um það að leikmennirnir hefðu verið sendir heim eftir að hafa brotið reglur settar af knattspyrnusambandinu. Enn fremur neituðu forráðamenn knattspyrnusambandsins að tjá sig frekar um atvikið.