Mosfellsbær hefur um langa hríð synjað Erling Smith um NPA samning, á grundvelli þess að framlög frá ríki skorti. Erling hefur þess í stað verið vistaður á hjúkrunarheimili, gegn eindregnum vilja hans.

Héraðsdómur Reykjavíkur felldi í morgun dóm þess efnis að Mosfellsbæ hefði verið óheimilt að binda NPA samning við fjárframlag frá ríkinu.

Var sveitarfélagið dæmt til að greiða Erling 700 þúsund krónur í miskabætur vegna dvalar hans á hjúkrunarheimilinu, auk þess sem Mosfellsbær er gerður ábyrgur fyrir því fjártjóni sem Erling hefur orðið fyrir meðan á þvingaðri dvöl hans hefur staðið.

Þuríður Harpa Sigurðardóttir, formaður ÖBÍ, segir þetta vera mikill sigur fyrir fatlað fólk því mikill fjöldi manns er á biðlista eftir NPA eða hefur verið synjað um hana. Hún segir þetta vera stórkostlegt réttindamál.

Þá telur dómurinn að dráttur sá sem varð á afgreiðslu umsóknar Erlings um NPA, sé saknæmur.

Í niðurstöðu dómara segir að í lögum nr 38/2018 sé ekki að finna heimild til þess að binda rétt fatlaðs fólks því skilyrði að fjárframlög berist frá ríkissjóði. Það megi því einu gilda gagnvart stefnanda hvernig skiptingu kostnaðar milli ríkis og sveitarfélaga er háttað og fallist á að slík skilyrðing eigi sér ekki lagastoð.

Dráttur Mosfellsbæjar á afgreiðslu málsins var 27 mánuðir, frá því að Erling lagði inn umsókn um notendastýrða persónulega aðstoð.

„Sá óhæfilegi dráttur sem varð á afgreiðslu málsins leiðir jafnframt til þess að skilyrði um saknæmi telst einnig uppfyllt. Málsmeðferðin hafi því falið í sér meingerð gegn réttindum stefnanda til fjölskyldu- og einkalífs.“