Benjamin Mendy bakvörður Manchester City er oft á tíðum að koma sér í fréttirnar fyrir vandræði utan vallar. Vandræðin koma reglulega upp og fara verulega í taugarnar á Pep Guardiola, stjóra liðsins.
Nú greina ensk blöð frá því að Mendy hafi á dögunum verið stoppaður af lögreglunni í Manchester, þar keyrði hann um á Lamborghini bílnum sínum sem kostar 85 milljónir íslenskra króna.
Það sem verra er að Mendy hafði gleymt að tryggja bílinn sinn og var hann því ólöglegur í umferðinni. Mendy gat svo ekki sýnt lögreglunni fram á það að hann væri með ökuréttindi. Segir í enskum blöðum að hann hafi verið próflaus.
Lögreglan sektaði Mendy um þúsund pund og var honum bannað að keyra bílinn fyrr en að búið væri að tryggja hann.
Mendy komst talsvert í fréttirnar um og eftir áramótin þegar hann ákvað að bjóða í áramótapartý, á sama tíma var útgöngubann á Bretlandi og fólk mátti ekki blandast á milli húsa.