Um hálf tíuleytið gærkvöldi var óskað eftir aðstoð lögreglu í veitingahúsi í miðbænum. Ástæðan var sú að matur hafði fests í hálsi konu sem hafði verið að neyta matar á veitingahúsinu. Svo virðist vera sem um ansi óhugnanlegt atvik hafi verið að ræða, en konan gat ekki andað vegna stíflunnar. Greint er frá málinu í dagbók lögreglu.

Fram kemur að hinni svokölluðu Heimlich-aðferð hafi verið beitt konunni til bjargar. Það hafi orðið til þess að matarbitinn hafi losnað og þá hafi konunni tekist að anda aftur. Þó hafi þurft að bíða eftir sjúkraflutningamönnum til að ná bitanum endanlega úr hálsinum, en það hafi þeir gert með töng.

Eftir atburðarásina hafi konan verið flutt til aðhlynningar á bráðadeild, þar sem hún var með litla meðvitund og mjög kvalin vegna álagsins.

Fleira kemur fram í dagbók lögreglu frá því í nótt. 15 útköll voru vegna hávaða á höfuðborgarsvæðinu á tímabilinu 23 til 5 í nótt. Þá var þónokkuð um að ökumenn væru stöðvaðir vegna gruns um akstur undir áhrifum fíkniefna. Og nokkur dæmi um umferðarslys eða óhöpp.