Almarr Ormarsson knattspyrnumaður er í áhugaverðu spjalli við Jóhann Skúla í hlaðvarpsþættinum, Draumaliðið. Almarr er án félags í dag en fram kemur í viðtalinu að hann sé með tilboð frá KA og hafi rætt við önnur félög.

Almarr hefur leikið með KA síðustu ár en áður lék hann með Fram og KR. Almarr gerir upp feril sinn og bestu samherjana í viðtalinu við Jóhann Skúla.

Almarr ræðir líka um skrautlega samherja og einn af þeim er franski sóknarmaðurinn, Azarkane Jallal. Hann gekk í raðir KA árið 2006 en dvöl hans gekk illa.

„Það var Frakki sem til okkar í KA árið 2006, það var skrautlegur gæi. Hann kunni ekki eitt orð í ensku og hélt að ég talaði frönsku, hann talaði alltaf frönsku við mig,“ sagði Almarr þegar hann rifjaði upp veru Azarkane Jallal hjá KA:

Jallal hafði meiri áhuga á skemmtanalífinu á Akureyri og í Reykjavík, það kostaði hann að lokum starfið.

„Hann fór á Kaffi Amor degi fyrir leik, var skammaður fyrir það. Hann sást svo á skemmtistað í Reykjavík degi fyrir leik sem við áttum á Akureyri, hafði farið að sækja vinn sinn í Keflavík og skellti sér á djammið. Hann drakk reyndar ekki en keyrði svo heim um nóttina og ætlaði að spila leikinn með okkur.“

„Hann var sendur heim eftir það.“