Tryggvi Hrafn Haraldsson gengur til liðs við Val frá Lilleström þar sem hann lék síðustu mánuði Trygvi var á láni hjá Lilleström frá ÍA.
Samningur hans við ÍA var hins vegar á enda og fer hann til Vals, líkt og Arnór Smárason sem kom til Vals frá Lilleström á dögunum.
Tryggvi hafði rætt við Val fyrr á árinu en ákvað að taka slaginn með Lilleström þegar það tilboð kom á hans borð, flestir töldu að Tryggvi yrði áfram í Noregi eftir gott gengi. Hann kaus hins vegar frekar að koma heim í Val.
Tryggvi gerir þriggja ára samning. Þessi öflugi leikmaður sem fæddur er 1996 lék 17 leiki með ÍA á nýliðnu tímabili og gerði í þeim 13 mörk. Hann á að baki 72 leiki í efstu deild og hefur skorað í þeim 25 mörk. Tryggvi hefur einnig leikið með sænska liðinu Halmstad. Hann gekk til liðs við Lilleström í Noregi í sumar og lék með þeim 11 leiki og gerði 4 mörk. Tryggvi átti stóran þátt í að Lilleström vann sig upp um deild í ár.
Tryggvi á að baki 13 landsleiki með U21 og 4 leiki með A landsliði Íslands og skorað í þeim 2 mörk.