Helgi Hrafn Gunnarsson, þingmaður Pírata og vísindahyggjumaður með meiru, lagði sitt á vogaskálarnar í gærkvöldi í umræðunni um Elísabetu Guðmundsdóttur, lýtaskurðlækni sem farið hefur mikinn í gagnrýni sinni á takmörkunum á daglegu lífi þjóðfélagsþegna vegna Covid-19 faraldursins.

DV sagði frá því í október að Elísabetu hefði verið sagt upp starfi sínu á Landspítalanum. Sagði Elísabet að henni hefði ekki verið gefin nein ástæða fyrir uppsögninni, en að henni grunaði að hún hafði með gagnrýni sína á yfirvöld að gera. Um helgina sagði DV svo frá því að Elísabet væri ekki lengur á starfsleyfaskrá Landlæknis. Leyfisleysi hennar hefur síðar verið staðfest af heilbrigðisyfirvöldum. Ef gengið er út frá því að hún hafi verið með læknaleyfi sitt gilt þegar hún var ráðin inn á spítalann 1. apríl síðastliðinn, er ljóst að hún hefur annað hvort verið svipt leyfinu síðan, eða skilað því inn sjálf. Heilbrigðisyfirvöld segjast ekki ætla að tjá sig um málefni einstakra lækna.

Helgi Hrafn segir þessi atriði þó engu máli skipta. Aðal atriðið sé að það sem Elísabet hefur verið að segja sé „efnislega rangt.“ Færslan vísar til fréttar Vísis í gærkvöldi þar sem Þórólfur Guðnason sóttvarnalæknis fer hörðum orðum um gagnrýni Elísabetar á sig og sín störf.

Helgi skrifar:

Þetta er hlutinn sem skiptir máli. Ekki persónan, ekki hvers vegna hún var rekin hvar, hvenær eða hvaða leyfi hún er með, heldur þetta. Að það sem hún segir er efnislega rangt og á skjön við þá vísindalegu þekkingu sem við höfum og getum sýnt fram á.

Færslu Helga má sjá hér að neðan.

Þetta er hlutinn sem skiptir máli. Ekki persónan, ekki hvers vegna hún var rekin hvar, hvenær eða hvaða leyfi hún er með, heldur þetta. Að það sem hún segir er efnislega rangt og á skjön við þá vísindalegu þekkingu sem við höfum og getum sýnt fram á. pic.twitter.com/aQxShwVNOv

— Helgi Hrafn Gunnarsson (@helgihg) December 7, 2020