Grétar Snær Gunnarsson leikmaður Fjölnis er sagður vera að ganga í raðir KR í efstu deild karla í knattspyrnu. Þetta kom fram í Dr. Football hlaðvarpsþættinum í gær.
Grétar er 23 ára gamall fjölhæfur leikmaður sem getur leyst stöður í vörninni og á miðsvæðinu.
Hann lék stórt hlutverk í slakasta liði efstu deildar í sumar en Fjölnir vann ekki leik í 18 tilraunum.
Grétar ólst upp í FH en hefur að auki spilað með HK, Víkingi Ólafsvík og nú síðast Fjölni.
Íslandsmótin í knattspyrnu voru blásin af í síðustu viku vegna kórónuveirunnar og félögin skoða nú flest leikmannamál sín.