Sólveig Anna Jónsdóttir, formaður Eflingar, fer ófögrum orðum um Ásgeir Jónsson, seðlabankastjóri, á Facebook í dag.

„Einn af hruns-prinsunum okkar. hann fékk starfið sitt í Seðlabankanum af því að hann er sérhagsmunaaðilum (fjármagnseigendum og auðvaldi) þóknanlegur. Það veit öll alþýða þessa lands.“

Frá því var greint í dag að Fjármálaeftirlit Seðlabanka Íslands sé nú með útboð Icelandair og ákvarðanatöku í kringum það til skoðunar. Ásgeir sagði á fundi Seðlabankans um fjármálastöðuleika í morgun að honum þætti óeðlilegt að hagsmunaaðilar væru í stjórnum lífeyrissjóðunum að taka ákvarðanir um fjárfestingar.  Vísaði hann þar til fulltrúa verkalýðsfélaga sem hagsmunaaðila. Þetta orðalag fór öfugt ofan í Sólveigu.

„Hann dirfist að uppnefna fulltrúa launafólks „hagsmunaaðila“, og beitir hótunum til að koma í veg fyrir að þeir nýti stjórnarskrárvarið tjáningarfrelsi sitt! Enn á ný (móðurgyðjan veri með mér, þetta er alveg endalaust) afhjúpast trylltur hrokinn sem þeir samborgarar okkar sem tilheyra auð og valdastétt þessa lands búa yfir og sá geigvænlegi eignaréttur sem þeir telja sig hafa yfir öllu á Íslandi, orðunum okkar líka.“

Sólveig telur það alveg rétt að taka þurfi til í stjórnum lífeyrissjóða. En það séu ekki fulltrúar verkalýðsins sem ættu að víkja þaðan.