Lágflug Boeing 747 júmbóþotu yfir Reykjavíkurborg fyrr í dag vakti ótta og furðu margra borgarbúa. Kviknuðu umræður á hverfahópum á Facebook þar sem sumir sögðust hafa íhugað að skríða undir húsgögn og hlaupa út úr húsum sínum.

Þær skýringar hafa fengist hjá yfirvöldum að leyfi hafi verið veitt fyrir lágflugi yfir borgina. Um var að ræða flugvél Air Atlanta sem var að koma til Íslands frá Chicago í Bandaríkjunum. Fátítt þykir að vélar Atlanta komi til Íslands og var heimkomu þessarar tilteknu þotu fagnað með áðurnefndu lágflugi. Af flugferli vélarinnar sem sjá má í skjáskoti hér að neðan að dæma virðist vélin hafa tekið stefnu á flugbraut Reykjavíkurflugvallar, lækkað flugið eins og um væri að ræða lendingu en flogið yfir völlin og beygt svo til austurs yfir höfuðstöðvar Atlanta, rétt sunnan við Smáralindina í Kópavogi. Að því loknu hélt vélin ferð sinni áfram til Keflavíkur þar sem hún lenti.

Að sögn heimildarmanna DV var leyfi veitt fyrir lágfluginu.