Líkt og DV greindi frá í dag þá hefur fjölda starfsfólks verið sagt upp í öryggisleit hjá Isavia á Keflavíkurflugvelli. Nú hefur Isavia birt yfirlýsingu vegna málsins. Þar kemur fram að 133 starsmönnum hefur verið sagt upp í dag, en ástæðan er fyrst og fremst heimsfaraldur kórónaveiru. Þá kemur fram að mikil óvissa muni ríkja næastu mánuði hjá Isavia. Auk þess er þeim sem var sagt upp óskað velfarnaðar.

Yfirlýsinguna má lesa hér að neðan:

Frá því að Covid 19 faraldurinn hófst á Íslandi þá hefur móðurfélag Isavia gripið til umfangsmikilla aðgerða sem snerta öll svið félagsins vegna þess samdráttar sem orðið hefur í flugi til og frá landinu í heimsfaraldrinum. Í dag var 133 starfsmönnum sagt upp störfum og 12 til viðbótar boðið að lækka starfshlutfall. Þessar aðgerðir í dag koma til viðbótar því að 101 starfsmanni Isavia var sagt upp störfum í lok mars síðastliðins. Síðan þá hefur auk þess verið gripið til ýmissa annarra hagræðingaaðgerða og skipulagsbreytinga svo sem sameiningu sviða og fækkunar í framkvæmdastjórn félagsins. Frá því Covid 19 faraldurinn hófst hefur stöðugildum hjá móðurfélagi Isavia nú fækkað um 40%

„Eftir ágætis gang í sumar, þar sem fjölgun ferðamanna um Keflavíkurflugvöll var nokkuð stöðug, þá varð alger viðsnúningur í kjölfar ákvörðunar um tvöfalda skimun með sóttkví á milli, “ segir Sveinbjörn Indriðason, forstjóri Isavia. „Flugfélög hafa dregið verulega úr framboði og eins og staðan er í dag þá er útlit fyrir að það breytist ekki í náinni framtíð. Forsendur okkar frá í sumar eru því brostnar og í dag gerum við ráð fyrir að umsvifin í vetur verði mjög lítil á Keflavíkurflugvelli. Það er því útlit fyrir að verkefni verði af skornum skammti fyrir hóp starfsmanna okkar næstu mánuðina.“

Sveinbjörn segir verulega óvissu um framvindu næstu mánuði og Isavia muni endurskoða stöðuna reglulega. Ef ástandið breytist til batnaðar geti Isavia brugðist hratt við þeirri breyttu stöðu.

„Við óskum öllu því fólki sem nú er að hverfa frá Isavia velfarnaðar, þökkum því fyrir þeirra störf og vonumst til að leiðir okkar liggi saman á ný fyrr en síðar,“ segir Sveinbjörn Indriðason.