„Einstaklingar sem hafa fengið veiruna sem veldur sjúkdómnum Covid-19 ættu þrátt fyrir það að fara eftir öllum sóttvarnarreglum og sýna gott fordæmi,“ segir Kjartan Hreinn Njálsson, aðstoðarmaður Landlæknis. Kjartan segir að þeir sem hafa sýkst þurfa ekki að sæta tveggja vikna sóttkví umgangist þeir einstakling sem reynist smitaður.

Eins og kom fram í síðustu viku er ekki hægt að veikjast tvisvar af Covid-19. Samkvæmt nýjustu tölum á covid.is hafa 1.888 einstaklingar lokið einangrun af þeim 2.014 sem hafa smitast.

Þeir einstaklingar sem hafa fengið Covid-19 og eru lausir við veiruna geta sóst eftir vottorði sem staðfestir það, samkvæmt hjúkrunarfræðingi á Landspítala. „Hægt er að óska eftir vottorðinu í símtali sem sjúklingur fær frá hjúkrunarfræðingi daginn fyrir útskrift. Þetta vottorð er hægt að nota við komuna til landsins. Þá sleppur viðkomandi við sýnatöku og sóttkví.“ Hjúkrunarfræðingurinn sagði að ekki væri öruggt að hægt væri að nota vottorðið við komuna til annarra landa. Ekki er tekið við vottorðum frá öðrum löndum en Íslandi við landamærin hérlendis.

Frá og með 19. ágúst þurfa allir sem koma til landsins að fara í tvöfalda skimun og fjögurra til fimm daga sóttkví.