Gabríel Benjamín, blaðamaður á Stundinni, telur líklegt að fjársterkur aðili sem hann er að vinna frétt um hafi reynt að fá sig til að þiggja mútur. Birti Gabríel færslu um málið á Twitter þar sem segir meðal annars:

„Í dag reyndi fjársterkur aðili hugsanlega að fá mig til að gerast brotlegur við 4. grein siðareglna blaðamanna og þiggja mútur.“

Í fjórðu grein siðareglna blaðamanna segir: „Það telst mjög alvarlegt brot þiggi blaðamaður mútur eða hafi í hótunum vegna birtingar efnis.“

Í samtali við DV segir Gabríel að hann geti ekki farið út í efnisatriði málsins en það verði afhjúpað í næsta tölublaði Stundarinnar sem kemur út þarnæsta föstudag.

„Það var talað undir rós en ég túlkaði skilaboðin þannig að ef ég myndi sjá frekar sjónarhorn viðmælanda þá gæti ég fengið einhverja umbun.“

Aðspurður hvort honum hafi áður verið boðnar mútur áréttar Gabríel fyrst að þetta hafi einungis hugsanlega verið boð um múturgreiðslur og segir síðan:

„Ekki svona bersýnilega en það hefur verið ýjað að ýmsu. Ég hef orðið fyrir hótunum en það er annað mál. Það kannast allir blaðamenn við að ef við erum að fjalla um óprúttna aðila þá auðvitað lendirðu í slíku fólki. Ég hef hins vegar aldrei fengið hótun sem ég hef tekið alvarlega. Það er sjaldgæft að fjársterkur aðili geri eitthvað eins og í Samherjamálinu, þar sem beinlínis er farið í manninn, en hinir og þessir aðilar reyna oft að hafa áhrif á fréttaefni og fréttamat eftir sínum leiðum.“