Paris Jackson, dóttir poppgoðsins heitins Michael Jackson, ræðir lífshlaup sitt í nýjum heimildarþætti á Facebook Watch sem nefnist; Unfiltered: Paris Jackson & Gabriel Glenn. Í þættinum er farið yfir líf hennar, tónlistina og sambúðina með kærastanum Gabriel Glenn.
Í þáttunum rifjar Paris upp þegar pabbi hennar stríddi henni á stelpum þegar hún var lítil og hve fljótur hann var að átta sig á kynhneigð hennar. Sjálf segist hún aldrei hafa átt von á því að enda í sambandi með manni. „Ég var viss um að ég myndi giftast konu þar sem ég hef verið með mun fleiri konum en mönnum,“ segir Paris sem þrátt fyrir ástarsamband sitt við Gabriel lítur á sig sem samkynhneigða frekar en tvíkynhneigða þar sem hún hafi ekki aðeins átt í samböndum við konur og menn. „Ég var einu sinni með manni sem var með píku.“
Hún viðurkennir þó að kynhneigðin hafi þvælst fyrir henni á yngri árum og þá hafi verið gott að hafa skilningsríkan föður. „Hann var fljótur að átta sig og stríddi mér á sama hátt og bræðrum mínum um að ég vildi kærustu,“ segir Paris sem telur sig heppna að hafa mætt þessum skilningi.
Eftir dauða Jackson bjó Paris hjá strangtrúaðri ömmu sinni og þar sem samkynhneigð var mikið tabú í samfélaginu hélt hún kynhneigð sinni út af fyrir sig. Hún hafi hins vegar einnig fundið mikinn stuðning hjá eldri bróður sínum, Prince (Michael Joseph Jackson Jr.) Móðir Paris og Prince er Debbie Rowe sem Micael Jackson var kvæntur frá 1996 -1999 en móðir yngri sonarins, Prince Michael Jackson II, sem var kallaður Blanket af föður sínum, er óþekkt staðgöngumóðir. Blanket breytti nafninu árið 2015 og heitir í dag Bigi Jackson.
Paris átti erfitt að fóta sig eftir dauða föður síns. Hún leiddist út í eiturlyfjanotkun og reyndi nokkrum sinnum að taka eigið líf. Í dag segist hún vera á góðum stað og líður vel í sambúðinni með Gabriel. „Það er gott að eiga loksins heimili, eitthvað sem ég átti ekki áður. Eina skiptið var þegar ég bjó með pabba og núna hef ég Gabe svo … ég er mjög heppin.“
