Tvö þúsund manns misstu vinnuna hjá Icelandair í gær, í stærstu hópuppsögn Íslandssögunnar. Tæplega 45 prósent voru flugfreyjur og flugþjónar. Sum þeirra hafa starfað hjá fyrirtækinu áratugum saman.

Flugfreyjustarfið hefur ávallt verið eftirsótt enda ákveðin dýrðarljómi sem fylgir því að þjóna í háloftunum. Gífurleg aðsókn hefur verið í sumarstörf flugliða hjá fyrirtækinu í gegnum árin og eftirspurnin eftir lausum stöðum margfalt meiri en framboðið. Fjölmargir þekktir Íslendingar hafa starfað hjá fyrirtækinu yfir sumartímann og má þar nefna Birgi Örn Guðjónsson lögreglumann, Margréti Vilhjálmsdóttur leikkonu, Evu Laufey Kjaran sjónvarpskonu og Jón Jósep Snæbjörnsson söngvara.

Undanfarin sólarhring hafa ótal flugliðar Icelandair breytt forsíðumynd sinni á facebook og birt mynd af sér í einkennisbúningi fyrirtækisins til að votta því stuðning sinn. Fjölmargir rita hjartnæmar kveðjur til vinnustaðarins og samstarfsfélaganna. Nokkuð ljóst er fjölmargir starfsmenn Icelandair hafa gríðarlega sterkar taugar til fyrirtækisins og líta yfir farinn veg með þakklæti í huga.