Það eru tæp fjögur ár liðin frá einu mesta afreki í íslenskri íþróttasögu þegar Ísland vann England í 16-liða úrslitum Evrópumótsins í Frakklandi. Leikurinn endaði með 2-1 sigri Íslands.
Á morgun er komið að því að mæta þeim ensku á nýjan leik þegar Englendingar mæti í Laugardalinn í leik í Þjóðadeildinni.
Útlitið var ekki bjart fyrir íslenska liðið því Wayne Rooney kom Englendingum yfir úr vítaspyrnu eftir aðeins fjögurra mínútna leik. Vítaspyrna hafði réttilega verið dæmd á Hannes Þór Halldórsson í marki íslenska liðsins eftir brot á Raheem Sterling.
Hafi einhver haldið að íslenska liðið myndi leggja árar bát skjátlaðist honum hrapallega. Það tók íslenska liðið aðeins rúma mínútu að jafna metin. Þar var á ferðinni varnarjaxlinn Ragnar Sigurðsson sem skoraði af stuttu færi eftir að Kári Árnason hafði skallað boltann til hans eftir langt innkast Arons Einars Gunnarssonar.
Íslenska liðið hélt frábærri einbeitingu áfram og á 18. mínútu komst Ísland eftir frábæra sókn og glæsilegt samspil. Íslenska liðið lék flottan einnar snertingar bolta og skoraði Kolbeinn Sigþórsson undir Joe Hart í marki enska liðsins. Fleiri mörk voru ekki skoruð í leiknum og var sigurinn fyllilega verðskuldaður. Vinnusemin, dugnaðurinn og orkan í íslenska liðinu átti sér fáar, ef einhverjar, hliðstæður. Hér að neðan eru rifjuð upp nokkur eftirminnileg augnablik eftir þennan ótrúlega fótboltaleik.
Þátttöku Íslands í mótinu lauk nokkrum dögum síðar, þann 3. júlí, í 8-liða úrslitum gegn Frakklandi. Lokatölur 5-2 en þrátt fyrir tapið bar íslenska liðið höfuðið hátt enda á sínu fyrsta stórmóti í sögunni. Mikill mannfjöldi tók á móti íslenska liðinu þegar það kom heim frá Frakklandi og að sjálfsögðu var víkingaklappið tekið.
