Davíð Þór Björgvinsson, varaforseti Landsréttar og Landsréttardómari, hefur fengið greiddar hátt í 30 milljónir króna fyrir að sinna störfum í gerðardómi í þremur málum, samhliða störfum sínum í Landsrétti, milli áranna 2016 og 2020.

Fréttablaðið greinir frá þessu í dag.

Samkvæmt reglum um aukastörf dómara er þeim bannað að taka að sér önnur störf samfara dómarastörfum sínum, nema þeir fái sérstaka undanþágu frá nefnd um dómarastörf.

Davíð segir við Fréttablaðið að hann hafi fengið þá heimild, en Fréttablaðið hefur eftir ónefndum lögmönnum að þó svo aukastörf hafi tíðkast meðal dómara, þá þekkist það ekki að þau séu það tímafrek og umfangsmikil að launin hlaupi á tugum milljóna.

Davíð var skipaður til málanna þriggja sem hlutlaus aðili og telur nefndin um dómarastörf að þess vegna hafi honum verið heimilt að ljúka þeim gerðarmálum.

Davíð er nokkuð eftirsóttur, en hann hefur tekið að sér ýmis aukastörf, kennslustörf við Háskólann í Reykjavík, rannsóknarprófessors við HÍ, auk þess að vera oddamaður í starfsráði Icelandair.

Þá fékk hann greidda eina og hálfa milljón fyrir lögfræðiráðgjöf sína til ríkislögmanns vegna greinagerðar í Landsréttarmálinu til Mannréttindadómstóls Evrópu árið 2018.