,,Það fer ekkert meira i taugarnar á mér en heimilisofbeldi gegn konum. Þurfti að alast upp við það allt mitt líf nánast. Þangað til eg varð “fullorðin” og þorði að stoppa það,“ skrifaði Damir Muminovic, varnarmaður Breiðabliks á Twitter á dögunum.

Varnarmaðurinn knái kom ungur að árum til Íslands frá Serbíu, skömmu eftir komuna til Ísands fór móðir hans að hitta íslenskan karlmann.

Fljótlega fór Damir að verða var við heimilisofbeldi gegn móður sinni en hann hafði þá búið á Íslandi í rúm fimm ár.

,,Þetta gekk á í nokkur ár. Ég varð fyrst var við þetta 15-16 ára og þetta var gróft,“ sagði Damir í ítarlegu viðtali við Fótbolta.net sem birtist í dag.

Damir varð einnig fyrir ofbeldi frá þessum manni en þorði ekki að tala við lögregluna. ,,Kærastinn hennar hefur líka tekið í mig þegar ég var yngri en ég hélt þessu inní mér og þorði ekki að hringja í lögregluna eða segja einhverjum frá þessu,“ sagði Damir við Fótbolta.net.

,,„Þegar ég var tvítugur kom ég heim og þá hafði þetta verið í gangi í lengri tíma. Mamma sagði mér frá þessu og þá urðu slagsmál á heimilinu milli mín og mannsins,“ sagði Damir en móðir hans lést árið 2017.

Af vef lögreglunnar:
Ekkert barn á að þurfa að þola ofbeldi eða verða vitni að ofbeldi. Allt ofbeldi á heimili þar sem börn dvelja, er jafnframt ofbeldi gagnvart börnum.

Vissir þú að ofbeldi er þegar einstaklingur eða hópur beitir valdi til að meiða eða niðurlægja aðra. Ofbeldi gegn börnum getur tekið á sig ýmsar myndir.