Einn eftirminnilegasti landsleikur í sögu Íslands var á Stade de France í Frakklandi árið 2016. Ísland mætti þá Austurríki og jafntefli hefði tryggt liðinu farmiða í 16 liða úrslit.

Þetta fyrsta stórmót hjá strákunum okkar var hreint magnað, sigur í leiknum gegn Austurríki myndi hins vegar tryggja liðinu leik gegn Englandi í 16 liða úrslitum.

Íslenska liðið átti undir högg að sækja í leiknum en varnarleikurinn var öflugur og Hannes Þór Halldórsson þar fyrir aftan var í stuði. Hannes rifjaði þennan leik upp við RÚV í gær.

„Ég var andvaka til sex um morguninn nóttina fyrir leikinn og mætti í hann hálf ringlaður af svefnleysi,“ sagði Hannes við RÚV þegar hann rifjaði upp þenann ótrúlega leik.

Undir lok leiksins fékk Ísland sína síðustu sókn og úr henni skoraði Arnór Ingvi Traustason sigurmarkið.

„Það var rosalegur léttir þegar við unnum boltann af því ég vissi að þá værum við með þetta. Svo kom í ljós að við vorum komnir í dauðafæri og spennan bara magnaðist og magnaðist þangað til boltinn endaði í netinu og allt sprakk út,“ segir Hannes og heldur áfram. „Ég brotnaði bara saman á leiðinni til baka þegar dómarinn flautaði svo af.“

,,Þetta var án efa mesta geðshræring og sigurvíma sem ég hef upplifað.“