Sighvati Björgvinssyni, fyrrverandi þingmanni og ráðherra Alþýðuflokksins og Samfylkingarinnar, var ekki skemmt yfir stuttmyndinni Gone, eftir Veru Sölvadóttur og Helenu Jónsdóttur, sem var endursýnd á RÚV þann 8. apríl.

Sighvatur tekur það að sér að biðjast afsökunar á gjörningnum fyrir hönd RÚV, í grein í Morgunblaðinu í dag, en í myndinni sést Ingvar E. Sigurðsson bregða á leik við Gljúfrastein, heimili nóbelsskáldsins Halldórs Laxness.

Sighvatur var ekki hrifinn af „skrípalátum“ Ingvars:

„Ríkissjónvarpið að kvöldi 8. apríl birti myndskreytingu frá heimili Nóbelsskáldsins okkar, sem sýndi vinsælan og vel metinn leikara í skrípalátum innan um húsbúnað og búsmuni Halldórs Laxness eins og hann skildi við þá fyrir andlátið. Eins og væri hann að draga dár að látnum rithöfundi með hljómtæki á eyrunum, klæddur í hvíta skyrtu og viðhafnarbúning velmetinna og með lakkskó á fótum, patandi og potandi út í loftið, baðandi báðum höndum út og suður, aftur og fram, gizka alvarlegur á svip, ekki mælandi eitt orð frá munni en stöðugt á hreyfingu frá herbergi til herbergis, upp og niður stiga, út og suður á sundlaugarlóð, gizka alvarlegur á svip – auðsjáanlega búandi yfir mikilli visku og þekkingu, sem aldrei var þó látin í ljós. Ekki mælt eitt orð um eða til þessa höfuðsnillings orðsins listar,“

segir Sighvatur, augljóslega yfir sig hneykslaður:

„Þessi kynning ef kynningu skal kalla var hneyksli. Hneykslanleg fyrir okkur, sem kynntumst og dáðum Halldór Laxness. Hneykslanleg fyrir þá, sem ekki þekkja hann – en þeir munu víst vera til hérlendis og þeir allmargir. Hneykslanleg fyrir Ríkisútvarpið og þá menningarstarfsemi, sem RÚV er ætlað að standa vörð um og sinna. Ég veit að það er ekki mitt hlutverk – en má ég samt biðja samborgara mína afsökunar fyrir hönd RÚV. Þeir munu nefnilega ekki gera það sjálfir. Kunna það víst ekki. Þannig er málum komið.“

Tilnefnd til Edduverðlauna – Engar kvartanir

Sem fyrr segir er um stuttmyndina Gone að ræða, sem fyrst var sýnd á RÚV árið 2016, en var endursýnd þann 8. apríl.

Skarphéðinn Guðmundsson, dagskrárstjóri RÚV, segir við Eyjuna að engar kvartanir hafi borist til RÚV vegna sýningar á myndinni, en var tilnefnd til Edduverðlauna sem besta stuttmyndin árið 2016.