Eignir sjóða fjárfestingarfélagsins GAMMA skruppu saman úr 5,2 milljörðum króna niður í um 40 milljónir króna á aðeins hálfu ári. Við rannsókn á því hvað kunni að hafa valdið þessu hafa menn meðal annars grafið upp tugmilljóna króna leynilegar greiðslur byggingaverktaka til lykilstarfsmanns GAMMA. Fyrirtækið hefur nú kært þessar greiðslur til lögreglu.

Fjallað er um málið í fréttaskýringaþættinum KVEIK á RÚV í kvöld.

Í texta KVEIKS um þáttinn segir meðal annars:

„Í kynningu, sem Kvika banki gerði fyrir furðu lostna fjárfesta Novus-sjóðsins í október 2019, var milljarðahvarfið skýrt þannig að milljarður hefði horfið vegna þess að fasteignir, sem byggðar höfðu verið, voru hreint ekki eins verðmætar og fullyrt hafði verið.

Nærri tveir milljarðar töpuðust vegna dýrra lána. Svo virðist sem gleymst hafi að gera ráð fyrir vaxtagreiðslum.

Ekki minni furðu vekur að heilir tveir milljarðar króna hurfu úr áætluðum eignum sjóðsins, þegar í ljós kom að fullyrðingar um hversu mikið var búið að byggja stóðust ekki. Þannig hafði bæði verið bókað og borgað fyrir framkvæmdir sem aldrei urðu.“