Samkvæmt tilkynningu frá Almannavarnadeild ríkislögreglustjóra hafa fimm ný smit af Kóróna-veirunni greinst í dag hérlendis. Smitin eru því samtals orðin 50.
Þrjú smitanna eru innlend og má rekja þau til einstaklinga sem voru á hættusvæðum erlendis. Hinir tveir sýktust erlendis. Tveir þeirra eru á þrítugsaldri, einn á fertugsaldri, einn á fimmtugsaldri og einn á áttræðisaldri. Allir búa á höfuðborgarsvæðinu
Leiðbeiningar Embættis landlæknis fyrir einstaklinga með áhættuþætti fyrir alvarlegri sýkingu COVID-19 er hægt að nálgast á vef landlæknis.
Ríkislögreglustjóri lýsti í gær yfir neyðarstigi almannavarna í samráði við sóttvarnalækni vegna kórónaveiru (COVID-19) eftir að fyrstu smit innanlands voru staðfest. Virkjun neyðarstigs hefur ekki teljandi áhrif á almenning umfram hættustig sem varað hefur frá 28. febrúar sl. Ekki hefur verið lagt á samkomubann.
Á upplýsingafundi Almannavarna og Embættis landlæknis með fjölmiðlum í dag var áréttað að starfsfólk sem vinnur með og sinnir einstaklingum með áhættuþætti ættu að forðast fjölmenn mannamót.
Á upplýsingafundinum ræddi Óskar Reykdalsson forstjóri Heilsugæslu höfuðborgarsvæðisins aukna getu heilsugæslunnar til að svara fyrirspurnum, sérstaklega í gegnum síma og á Heilsuvera.is. Þórólfur Guðnason sóttvarnalæknir fjallaði um stöðu og þróun mála hér á landi sem og erlendis og Alma Möller landlæknir fjallaði um leiðbeiningar fyrir einstaklinga með áhættuþætti fyrir alvarlegri sýkingu COVID-19. Víðir Reynisson yfirlögregluþjónn fór yfir yfirstandandi verkefni almannavarna.
Sjá einnig: Smitin eru öll rakin til skíðaferða í Ítalíu og Austurríki
