„Á meðan ekki er lýst yfir samkomubanni verður messað í Laugarneskirkju eins og áætlun gerir ráð fyrir. Hins vegar hafa þau tilmæli borist frá biskupi að altarisgöngur verði ekki viðhafðar að svo stöddu og verður orðið við því. Kirkjugestir verða ekki heldur kvaddir með handabandi eftir athöfn eins og venjan er. Við vekjum athygli á því að handspritt er í brúsum í anddyri kirkjunnar og hvetjum við kirkjugesti til að nýta sér þá.“

Þetta segir í tilkynningu frá Davíð Þór Jónssyni, sóknarpresti í Laugarneskirkju.

Einnig kemur fram að fermingar munu verða eins og áætlað er á meðan ekki er samkomubann. Þær verða hins vegar án handabands og altarisgöngu.

Þá segir enn fremur í tilkynningunni:

„Við í Laugarneskirkju förum að fyrirmælum sóttvarnarlæknis og annarra sem leggja okkur línurnar í þessum efnum. Við biðjum jafnframt fyrir þeim öllum sem búa við mikið álag við að fyrirbyggja vá og vakta stöðuna almenningi til heilla.

Við minnum á að í samfélagi okkar eru aldraðir ástvinir og fólk með undirliggjandi sjúkdóma. Nú er það okkar allra að vernda þessa samferðamenn okkar sem eru í sérstökum áhættuhópi með því að sýna ábyrgð.“