Kona sem væntanleg er til landsins eftir skíðaferð til Ischgl í Austurríki segir að enginn í hópnum hennar sé lasinn. Hins vegar séu allir á leið í sóttkví. Von er á 74 farþegum með vél frá Verona í dag og fara þeir farþegar allir í sóttkví.

Konan, sem tjáir sig um þetta á Facebook, segir að fólkið taki þessu mjög alvarlega og enginn ætli að reyna að koma sér undan sóttkví. Flestir séu mjög daprir yfir því að eiga ekki eftir að hitta börnin sín lengi.

„Jæja krakkar, nú erum við vinahópurinn sem safnaði sér í langan tíma fyrir skíðaferð drauma okkar, á leið heim frá stórhættulega svæðinu Ischgl. Við viljum að allir viti að við erum búin að tilkynna okkur til samhæfingarstöðvar almannavarna, landlæknis,icelandair osfrv. osvr. Við erum öll á leið í sóttkví, enginn lasinn. Við tökum hlutskipti okkar mjög alvarlega þó allir séu mjög sjokkeraðir og daprir að fá ekki að hitta börnin okkar ótrúlega lengi. Hugur okkar er hjá öllum þeim sem eru í áhættuhóp að veikjast alvarlega af covid-19 og við munum gera allt sem í okkar valdi stendur til að hefta útbreiðslu veirunnar. Þó að við höfum reynt að njóta lífsins og hlægja að hlutunum tökum við aðstæðum alls ekki léttvægt. Ást og friður.“