Útvarp Saga greinir frá þessu á vefsíðu sinni í dag. Þar kemur fram að afgerandi meirihluti þeirra sem tóku þátt í skoðanakönnuninni myndu vilja sjá Vigdísi sem næsta borgarstjóra Reykjavíkur.
„Þetta kemur fram í niðurstöðu könnunarinnar sem fram fór hér á vefsíðunni á síðasta sólarhring. Niðurstaðan var kynnt í lok þáttarins Línan laus rétt fyrir hádegi í dag en í þessari könnun var spurt: Hvern vilt þú sjá sem næsta borgarstjóra í Reykjavík?“
Í könnuninni fékk Vigdís tæp 60% atkvæða. Dagur B. Eggertsson, núverandi borgarstjóri Reykjavíkur fékk einungis 6,2% atkvæða. Það þarf þó að hafa það í huga að skoðanakannanir Útvarps Sögu ná þó ekki til jafn margra og aðrar skoðanakannanir sem teknar eru hér á landi. Það má því draga það verulega í efa hvort könnunin sé marktæk en einungis 649 greiddu atkvæði í könnuninni.
Vigdís sjálf virðist þó vera hæstánægð með könnunina en hún deilir niðurstöðunum á Facebook-síðu sinni. „Ég þakka kærlega fyrir traustið,“ segir Vigdís. „Ætla að standa undir væntingum.“
Niðurstaða könnunarinnar:
Vigdísi Hauksdóttur 58,4%
Eyþór Arnalds 15,7%
Kolbrúnu Baldursdóttur 10%
Sönnu Magdalenu Mörtudóttur 8,9%
Dag B. Eggertsson 6,2%
Þórdísi Lóu Þórhallsdóttur 0,6%
Líf Magneudóttur 0,3%
Dóru Björt Guðjónsdóttur 0,2%
Alls voru greidd 649 atkvæði
