Danski lagaprófessorinn Mads Bryde Andersen hefur áhyggjur af framgöngu Mannréttindadómstólsins í Strassbourg (MDE) og segir hann kominn út fyrir valdsvið sitt með skapandi túlkunum á Mannréttindasáttmála Evrópu. Geti það ógnað lýðræðinu. Þetta kemur fram í viðtali Morgunblaðsins við Mads Bryde en hann flutti erindi þessa efnis á afmælishátíð hundrað ára afmælis Hæstaréttar Íslands í Þjóðleikhúsinu um síðustu helgi.

Sem dæmi um skapandi túlkun á ákvæðum Mannréttindasáttmálans nefnis Mads Bryde réttinn til friðhelgi einkalífsins. Í túlkunum sínum hafi MDE fellt undir þetta réttinn til að búa ekki við hávaða frá flugvélum. Upphaflega hafi lög um friðhelgi einkalífsins hins vegar verið túlkuð sem vernd gegn ólöglegum símahlerunum og frelsissviptingu.

Meðal annarra dæma sem Mads Bryde nefnir í viðtalinu, um meinta skaðlega framgöngu MDE, sé það álit dómstólsins að það feli í sér mismunun að festa lögfesta lágmarksaldur við hjónabönd innflytjenda. Danir hafi sett þessi lög til að koma í veg fyrir þvinguð hjónabönd innflytjenda.

Mads Bryde nefnir síðan dæmi um frjálslega túlkun MDE á ákvæðum um vernd gegn pyntingum og ómannúðlegri meðferð. Þar kemur við sögu maður sem vísa átti frá Danmörku til Tyrklands. Maðurinn átti við andleg veikindi að stríða og þar sem talið var að hann fengi ekki eins góða geðheilbrigðisþjónustu í Tyrklandi og Danmörku jafngilti það ómannúðlegri meðferð eða pyndingu að vísa honum til Tyrklands, að mati MDE. Mads Bryde segir um þetta:

„Ef dómurinn stendur gæti Danmörk orðið að stóru geðsjúkrahúsi fyrir sérhvern útlending sem neitar að fara úr landi, enda geti það falið í sér pyndingu að vera sendur til
lands sem býður ekki sömu meðferðarúrræði og Danmörk.“

Mads Bryde telur að ákvarðanir af þessum toga eigi að vera teknar af kjörnum fulltrúum og hann telur þessa framgöngu MDE ganga gegn lýðræði. Hann hafi hins vegar orðið var við það í heimalandi sínu að menn veigri sér við að gagnrýna MDE af ótta við að verða úthrópaðir.