Starfsmenn Hafrannsóknarstofnunnar, sem jafnframt eru í Félagi íslenskra náttúrufræðinga (FÍN) segja að stjórnendur stofnunarinnar framkvæmi hluti eftir eigin geðþótta, mögulega í bága við lög og sýni öðrum starfsmönnum vanvirðingu og viðhaldi ógnarstjórnun á vinnustaðnum.

Þetta kemur fram í bréfi frá FÍN til forstjóra Hafró sem sent var í síðustu viku og Morgunblaðið hefur undir höndum og greinir frá.

Mikið gekk á hjá Hafró í fyrra, en tíu manns var sagt upp og sögðu fjórir úr yfirstjórninni upp störfum, en í ályktun starfsmanna kom fram að um harkalegar uppsagnir hefði verið að ræða.

Ekki góður vinnustaður

Í bréfinu frá FÍN segir að félagsmönnum líði illa á vinnustaðnum. Þar sé starfsfólki hótað og „tekið á teppið“ ef það tjái sig um málefni Hafró og er nefnt að tjáningarfrelsi starfsmanna sé ekki virt.

Er stjórnunarstíllinn sagður ógnandi og einkennast af þöggun ágreinings, þegar hann kemur upp.

Þá er sérstaklega nefnt að ekki megi yfirmenn stofnunarinnar láta trúnaðarmann FÍN gjalda þess að hann sinni því starfi.

Þá er einnig bent á að stofnunin þurfi að setja sér verklag um hvernig beri að auglýsa laus störf hjá stofnuninni og gæta þurfi meiri nærgætni við uppsagnir.

Þá er þess krafist að unnið verði lögbundið áhættumat á stofnuninni, sé það ekki til staðar, og vísað er í lög um aðbúnað og hollustuhætti á vinnustöðum og reglugerð um einelti.

Þá er einnig tekið fram að atvinnurekanda sé óheimilt að að leggja starfsmenn í einelti, og áreita starfsfólk kynferðislega og beita það ofbeldi.

Þá er sagt í bréfinu að stjórnendur þurfi að fá aðstoð við að verða betri stjórnendur.