„Veðurhorfur næstu klukkutíma benda til þess að veðrið versni nú fyrir hádegi mjög austanlands og suðaustanlands austan Öræfa,“ segir í frétt á Facebook-síðu Landsnets.
Þar segir að talsverðar líkur séu á truflunum af völdum vinds og/eða ísingar á Byggðalínuna suðaustanlands og á flutningslínur á Austfjörðum, Héraði og Vopnafirði fram yfir hádegi. Þá eru áfram horfur á verulegri skýjaísingu austantil á Norðurlandi ofan 300-400 metra hæð í allan dag.
Nú, rétt fyrir klukkan 10, er rafmagnslaust á Dalvík en Dalvíkurlína sem liggur á milli Akureyrar og Dalvíkur leysti út klukkan 07:59 í morgun. Notendur á Dalvík og nágrenni eru því án rafmagns frá flutningskerfinu.
„Tilraun var gerð til að setja tengivirkið í Hrútatungu án árangurs. Starfsmaður Rarik komst loks í virkið eftir 9 klukkustunda ferðalag frá Hvammstanga. Að sögn voru allir rofar hrímaðir og líklega mikil selta.“