Íslandsbanki og Arion banki hafa nýtt ákvæði í lánssamningum við fyrirtæki til að hækka vexti. Arion lét fyrst til skara skríða fyrr á árinu og nú hefur Íslandsbanki fylgt í fótspor hans. Bankarnir eru að bregðast við lágri arðsemi og kenna bankaskatti og háum eiginfjárkröfum um.

Fréttablaðið skýrir frá þessu. Haft er eftir Ólafi Stephensen, framkvæmdastjóra Félags atvinnurekenda, að hann hafi heyrt að vaxtaálag ofan á grunnvexti hafi hækkað um allt að eitt prósentustig á lánum fyrirtækja sem eru í félaginu.

„Við höfum fengið ábendingar um að bankinn hafi verið að hækka vaxtaálagið nokkuð duglega, jafnvel hátt í tvöfalt. Þetta er alls ekki eitthvað sem fyrirtæki þurfa á að halda þegar hægt hefur á efnahagsumsvifum og allur kostnaður er á uppleið. Og þetta er óneitanlega svolítið öfugsnúið vegna þess að atvinnurekendur höfðu talið að þeir myndu njóta vaxtalækkana Seðlabankans.“

Er haft eftir Ólafi.

Fyrirtækin sem hafa lent í þessu eru minni og meðalstór. Fyrir breytinguna var vaxtaálagið á þau á bilinu 1,2 til 1,5 prósent.

Haft er eftir Jóni Guðna Ómarssyni, framkvæmdastjóra fjármála hjá Íslandsbanka, að vaxtakjör séu heldur að hækka en það sé þó breytilegt eftir fyrirtækjum. Áhætta í rekstri lántaka skipti til dæmis máli hvað varðar vaxtakjör sem og ýmsir aðrir þættir. Hann sagði einnig að verið sé að bregðast við lágri arðsemi af undirliggjandi rekstri bankanna.