Darri sonur Líf Steinunnar Lárusdóttur greindist með sjaldgæfa tegund af hvítblæði í byrjun janúar þegar hann var tæplega eins árs.
„Darri var búinn að vera mikið veikur allt haustið en læknarnir fundu aldrei neitt að honum,“ sagði Líf í samtali við Bleikt.
„Hann var í viku á spítala í október í alls konar rannsóknum en eina sem læknarnir gátu sagt okkur var að hann væri með allt of fá hvít blóðkorn.“
Þeim var þá sagt að passa rosalega vel upp á Darra þar sem hann var ekki með neinar varnir í líkamanum. Í desember fór Darra versnandi og var farinn að þrútna í kringum augun og fá einkennilegar kúlur á höfuðið. Hann var lagður inn á spítala þann 4. janúar fárveikur og var í viku í rannsóknum.
„Svo var hann sendur í sneiðmyndatöku eftir viku og þurfti þá að svæfa hann. Læknarnir þurftu að hætta í miðri myndatöku þar sem Darri höndlaði illa svæfinguna og var settur í öndunarvél og beint á gjörgæslu nær dauða en lífi. Daginn eftir fengum við greininguna. Aml hvítblæði og Darri var allur æxlaður á höfðinu og með tvö stór æxli við mænu og heila.“
Darri var haldið sofandi í öndunarvél í mánuð á gjörgæslunni. „Eftir þetta er hann búinn að ganga í gegnum rosalega erfiðan tíma með alls konar uppákomur en Darri er algjör hetja og stendur sig ótrúlega vel,“ segir Líf Steinunn.
Líf setti inn færslu í Facebook hópinn „Gefins, allt gefins“ þar sem hún óskar eftir burðarpokum og þroskaleikföngum fyrir Darra en honum vantar einnig ýmsilegt annað. Færslan hefur vakið mikla athygli og margir hafa boðið fram aðstoð sína. Ef þú vilt koma einhverju til Darra þá er hægt er að hafa samband við Líf Steinunni í gegnum Facebook.
