Anton Örn Guðnason hefur verið ákærður fyrir sérstaklega hættulega líkamsárás en afleiðing hennar var að maðurinn hlaut verulegt sjóntap. Þetta er ekki í fyrsta skipti sem Anton er sakaður um slíkt því í fyrra var hann dæmdur í fimm og hálfs árs fangelsi fyrir manndrápstilraun.

Anton er samkvæmt ákæru sakaður um að hafa aðfaranótt 30. ágúst 2016, fyrir framan Hafnarstræti 18 í Reykjavík, ráðist á karlmann. Hann er sakaður um að hafa slegið hann ítrekað í höfuð og andlit með stólfæti.

Afleiðingar þessa voru voveiflegar fyrir manninn því hann hlaut „brot á vanga- og kinnkjálkabeinum, mar á augnknetti og augntóttarvefjum, mar á augnloki og augnsvæði og augnskaða sem hafði í för með sér verulegt sjóntap en sjón hans varð 10% sjón á vinstra auga og 40% sjón á hægra auga.“ Maðurinn sem varð fyrir árásinni krefst fimm milljóna króna í miskabætur.

Anton hefur ítrekað komist í kast við lögin en fyrr á þessu ári var hann dæmdur í þriggja mánaða fangelsi eftir hafa verið í tvígang gómaður með sýru og gervigras á Litla-Hrauni. Þar situr Anton af sér dóm vegna manndrápstilraunar.

Í því máli var hann dæmdur fyrir að hafa ráðist inn á heimili fórnarlambsins í slagtogi við tvo aðra menn og voru þeir vopnaðir hnífum og mace-brúsum. Hann stakk manninn svo í kviðinn. Mennirnir sögðust hafa verið staddir á heimili fórnarlambsins í þeim erindagjörðum að rukka inn 2 milljón króna skuld, en þeir sökuðu hann um að hafa stolið fíkniefnum af Antoni Erni.